د هرات ښار د پنځم منار د ترميم او ساتنې د څرنګوالي دويمه غونډه جوړه شوه
د اطلاعاتو او فرهنګ وزارت د سرپرست او نوماند وزير محمد طاهر زهير په مشرۍ د هرات ښار د پنځم منار د ترميم او ساتنې د څرنګوالي په اړه غونډه جوړه شوه. په دې غونډه کې د يونسکو د فرهنګي څانګې مسوول، د اطلاعاتو او فرهنګ وزارت د تاريخي آبداتو او لرغونپېژندنې رييسانو گډون کړی و.
په غونډه کې کارپوهانو د هرات د پنځم منار د ساتلو، ټينګولو او ترميم په اړه خپلې نظريې او تجربې څرګندې کړې.
په پای کې د اطلاعاتو او فرهنګ وزارت سرپرست او نوماند وزير محمد طاهر زهير وويل: پنځم منار په ناوړه حالت کې دی او موږ ډېر فرصت لرو. له نړيوالو همکارانو غواړو چې د ناوړې پېښې مخه بايد ونيول شي.
هغه همدارنګه ټينګار وکړ چې د تاريخي آبداتو رياست دې له کارپوهانو سره په همغږۍ کې عملي کار پيل کړي. ده له هغو بنسټونو مننه وکړه چې د منارونو په ساتنه کې له اطلاعاتو او فرهنګ وزارت سره همکاري کوي.
کابل/ د تلې ۲۴مه/ باختر
