د هېواد د مشهور هنرمند حشمت فنایي پر مړینې د اطلاعاتو او فرهنګ وزارت د خواشینۍ او خواخوږۍ پیغام
په خواشینۍ مو خبر تر لاسه کړ چې د هېواد د تیاتر او سینما مشهور هنرمند حشمت فنایی د ورپېښې ناروغۍ له امله سترګې له نړۍ پټې کړې.
ارواښاد فنایي د خپل ژوند ډېر کلونه د سینما او تیاتر هنر په چوپړ کې تېر کړل او په دې لاره کې یې هڅې اوکوښښونه د قدر وړ دي. ده د خپلو همکارانو او همدارنګه خلکو په منځ کې ځانګړی درنښت او ځای لاره.
د اطلاعاتو او فرهنګ وزارت رهبری د حشمت فنایي مړینه ضایعه بولي او د لوی خدای له درباره ارواښاد ته د فردوس جنت او د ده کورنۍ، خپلوانو، مینه والو اوهمدارنګه د هېواد ټولو هنرمندانو ته د جمیل صبر هیله کوي.
کابل / د غبرګولي ١٥مه / باختر
