د خوست ببرک تاڼې له ټولو ډلګۍ مشرانو سره د همغږۍ غونډه وشوه
د خوست د اطلاعاتو او فرهنګ ریاست اړوند د جهادي آثارو د ساتنې مدیریت د ببرک تاڼې له ټولو ډلګۍ مشرانو سره د همغږۍ غونډه وکړه.
په غونډه کې د جهادي آثارو د ساتنې مدیر د روانو فعالیتونو په اړه خبرې وکړې او ویې ویل: د ببرک تاڼې د ټولو شهیدانو د اجمالي شهرتونو راټولول د کار لومړنی پړاو دی، چې په همدې موخه ډلګۍ مشرانو ته د شهیدانو نوملړ سپارل شوی، ترڅو د ټولو شهیدانو نومونه او معلومات په دقیقه توګه مشخص شي.
دغه راز د ببرک تاڼې په کچه د ترسره شویو جنګي پېښو، جنګي جنایتونو او لویو عملیاتو په اړه هم خبرې وشوې. په دې برخه کې ډلګۍ مشرانو د اړینو معلوماتو د راټولولو او شریکولو ډاډ هم څرګند کړ. دوی وویل: د خپلو ملګرو په مرسته به د شهیدانو معلومات او سوانح راټولې او وروسته به یې له یادې ادارې سره شریکې کړو، ترڅو په ځانګړو فورمونو کې ثبت او تنظیم شي.
۱۴۴۸/۶/۳ هـ.ق
