فاریاب کې د کتاب او هنري آثارو دوه ورځنی نندارتون پرانیستل شو
د فاریاب اطلاعاتو او کلتور ریاست له لوري د میمنې ښار اړوند ظهیرالدین فاریابي عامه کتابتون په سالون کې د روژې مبارکې میاشتې په مناسبت د کتاب او هنري آثارو دوه ورځنی نندارتون پرانیستل شو.
د اطلاعاتو او کلتور رئیس وویل: له دغه نندارتون جوړولو څخه موخې د مطالعې کلتور عامول، له هنر څخه ملاتړ او ځوانان فرهنګي فعالیتونو ته هڅول دي.
د نوموړي په وینا: په دې نندارتون کې ۱۰۰۰ ټوکه علمي، ادبي او فرهنګي کتابونه او همدارنګه د محلي هنرمندانو شاوخوا ۵۰ هنري آثار نندارې ته وړاندې شوي دي.
نوموړي زیاته کړه؛ دغه نندارتون ځوانانو، زده کړیالانو او د فرهنګ او هنر مینوالو ته مناسب فرصت برابروي، ترڅو د علمي او هنري آثارو سره لا ښه آشنا او له هغو څخه ګټه واخلي.
یو شمېر ګډونوالو یاد نندارتون جوړول د مطالعې کلتور پیاوړتیا او له هنرمندانو څخه د ملاتړ په برخه کې ارزښتمند ګام وباله او فاریاب کې د ورته نورو فرهنګي پروګرامونو د دوام غوښتونکي شول.
۱۴۴۷/۹/۲۰ هـ ق
