بلخ کې له وړيا ښوونیز مرکز څخه سلګونه ځوانان فارغ شول
د بلخ ولايت د اطلاعاتو او کلتور ریاست د ځوانانو چارو آمریت له وړيا ښوونیز مرکز څخه ۲۰۰ تنه ځوانانو له شپږ میاشتنیو زده کړو وروسته د فراغت سندونه ترلاسه کړل.
د اطلاعاتو او کلتور رئیس مولوي محمدالله ضرار ځوانان د ټولنې متحرک او فعال ځواک یاد کړ او څرګنده یې کړه، چې د هر وخت په پرتله افغان ځوانان اوس د خپلو مسؤلیتونو په اړه جدي دي، په ديني او عصري علومو کې د زده کړې لپاره هڅې کوي، همدارنګه ښاغلي ضرار ځوانان د ټولنې نه ستړي کېدونکي معماران یاد کړل او ويې ويل: افغانستان روزل شوي او غښتلي ځواک ته اړتیا لري او اسلامي امارت د ځوانانو د دیني او عصري علومو په برخه کې لازم امکانات برابروي.
ګډونوالو ځوانانو د اطلاعاتو او کلتور ریاست او نورو ادارو څخه مننه وکړه او غوښتنه یې وکړه، چې په دې برخه کې د نورو ځوانانو لپاره د دغه ډول پروګرامونو جوړولو هڅه هم وکړي.
د یادونې وړ ده، چې دغه ځوانانو د شپږو میاشتو په اوږدو کې د بلخ د اطلاعاتو او کلتور ریاست او د اکتید دفتر په همکارۍ د انګلیسي، کمپیوټر، ويناوالۍ او خوش نویسۍ په برخو کې زده کړې وکړې.
۱۴۴۶/۸/۱۴ هـ ق
۱۴۰۳/۱۱/۲۵ هـ ل
