لغمان کې  تاريخي او د ګرځندوی سيمې او ځايونه تثبيت او ثبت شول

د اطلاعاتو او کلتور وزارت یوه پلاوي په لغمان ولايت کې ۹ تاريخي او د ګرځندوی وړ سيمې تثبیت او ثبت کړې.
د اطلاعاتو او کلتور وزارت پلاوي مشر احسان الله بهير وویل: د لغمان ولايت د اطلاعاتو او کلتور رياست سره يې په همغږۍ د لغمان ولايت بيلابېلو تاريخي او ګرځندوی سيمو ته سفرونه وکړل، ګڼ شمېر سيمې يې له نږدې وليدې، چې له جملې يې ۹ سيمې تثبيت او ثبت کړل شوې.
بل لور ته د لغمان ولايت د کلتور او ګرځندوی آمر محمد يعقوب ايوبي وايي، چې د ګرځندوی د کلتور  د پياوړتيا او د ګرځندويانو د جذب په موخه په دې ولايت کې یې  تاريخي ځايونه او د ګرځندوی سيمې په مرکز مهترلام، الينګار، دولت شاه او قرغيو ولسواليو کې تثبيت او ثبت کړي دي.
سربېره پر دې  لغمان ولايت د ښکلو درو، څپاندو سيندونو او لوړ غرونو په درلودلو سره د پام وړ ګرځندوی سيمې او ځايونه لري، چې د داخلي ګرځندويانو ترڅنګ له بهرنيو هېوادونو څخه هم وخت ناوخت ګرځندويان نندارې ته راځي او له بېلابېلو سيمو څخه ليدنې کوي.

۱۲/۴/۱۴۴۶ هـ ق
۲۴/۷/۱۴۰۳ هـ ش