څرخ ولسوالۍ کې د کتابونو یو ورځنی نندارتون جوړ شو
د لوګر ولايت د اطلاعاتو او کلتور رياست له لوري د څرخ ولسوالۍ په بازار کې د کتابونو یو ورځنی نندارتون جوړ شو، چې د یاد رياست د مسؤلينو تر څنګ پکښې ګڼ شمېر ځوانانو او زده کوونکو ګډون کړی وو.
د اطلاعاتو او کلتور ریاست د فرهنګ او ګرځندوی آمر وويل: دغه نندارتون څرخ ولسوالۍ کې د یوې ورځې لپاره جوړ شوی و، چې پکښې د مرکز پل علم تر څنګ د څرخ ولسوالۍ د خصوصي کتاب پلورنځیو سلګونه ټوکه کتابونه او د سیمه ییز موزیم آثار نندارې ته وړاندې شوي وو.
ښاغلي تسل د دغه نندارتون له جوړولو څخه موخه په ټولنه کې د مطالعې دود پراختیا او غښتلي کول، د ځوانانو، زده کوونکو، زده کړیالانو او خلکو ترمنځ د مطالعې فرهنګ ته پراختیا ورکول یاد کړل.
د نندارتون ګډونوال د اطلاعاتو او کلتور ریاست دغه نوښت بیساری بولي او دې ته ورته د نورو نندارتونونو جوړولو غوښتنه کوي.
همداراز څرخ ولسوالۍ کې د خصوصي کتاب پلورنځیو مسؤلینو وویل: په لومړي ځل دغه ولسوالۍ کې د کتاب د نندارتون د جوړولو شاهدان یو، څرخ ولسوالۍ کې له کتابونو او مطالعې سره د خلکو مينه تر پخوا زياته شوې او هره ورځ لسګونه کسان په ځانګړي توګه ځوانان دوی ته د کتاب اخېستلو لپاره مراجعه کوي.
۱۴۴۶/۱۲/۲۱ هـ ق
