د تخار په ورسج ولسوالۍ کې له تاريخي آبداتو ليدنه وشوه

د تخار ولايت داطلاعاتو او کلتور رياست رئيس مولوي ذبيح الله انصاري ورسج ولسوالۍ ته د سفر پرمهال د شيخ ولي الله له زيارت څخه چې يوه لرغونې تاريخي آبده ده ليدنه وکړه.
ښاغلي انصاري د شيخ ولي الله له زيارت څخه د ليدنې پرمهال وويل: تاريخي آبدې د هيواد تاريخي لرغونتوب او هويت ښيي، باید له تخريب څخه يې ډډه وشي.
د ورسج اوسيدونکي وايي: شيخ ولي الله په ( ۱۰۰۰ هـ ق) کال د ماوراء النهر په سمرقند کې وفات شوی، چې د مريدانو له لوري يې تابوت ورسج ته راوړل شوی او د خانقاه په مربوطاتو کې دفن کړل شوی دی، مقبره يې د خانقاه په ۳۰ يا هم څلويښت مترۍ کې جوړه شوې ده، چې تاريخي لرغونتوب يې شاوخوا ۵۰۰ کالو ته رسيږي.
د تخار ولايت داطلاعاتو او کلتور رياست مسؤلين وايي: د اسلامي امارت له حاکميت وروسته د سرتاسري امنيت راتلو سره سلګونه بهرنيو او کورنيو سيلانيانو د تخار له تاريخي آبدو څخه ليدنه کړې ده.

۱۴۴۶/۳/۲۵ هـ ق
۱۴۰۳/۷/۷  هـ ل