په هرات کې د ټیکا دفتر په همکارۍ د ګرځندوی د نړیوالې ورځې په مناسبت یو نندارتون جوړ شو
په هرات کې د ټیکا دفتر په همکارۍ د ګرځندوی د نړیوالې ورځې په مناسبت یو نندارتون جوړ شو، په دې اړه د هرات د اطلاعاتو او کلتور رئيس مولانا نعيم الحق حقاني وايي، چې دغه نندارتون د هېواد لاسي صنايعو او هنرونو ته د بازار موندنې په موخه جوړ شوى دی.
د ښاغلي حقاني په خبره، په دغه درې ورځني نندارتون کې به د ښځو د لاسي صنایعو لپاره ۱۰۰ غرفې او د نارینه وو لپاره ۶۰ غرفې اېښودل شوې دي.
په ورته وخت کې د هرات د اطلاعاتو او کلتور ریاست د ګرځندوی آمر مولوي رحمت الله محمدي وايي، په دې مناسبت ښځې او نارینه کولای شي د روانې اوونۍ له چهارشنبې څخه تر جمعې پورې په دغه نندارتون کې ګډون وکړي.
څو ننداره چيانو د دغه نندارتون په جوړولو خوښي څرګنده کړه او ویې ویل: دغه نندارتون د دوى د هنري آثارو د معرفي کولو لپاره اغېزمن دى.
۱۴۴۵/۳/۱۲ هـ ق
۱۴۰۲/۷/۵ هـ ش
