ښوونکي د ملت سرمایه ده د نوي نسل د روزنې مسؤلیت لري

یادې څرګندونې نن یکشنبه ( ۱۴۴۵/۱/۲۷هـ ق) د اطلاعاتو او کلتور وزارت سرپرست ملا خیرالله خیرخواه په سپېدار ماڼۍ کې هېواد ته د راستانه شویو کدرونو او پوهنتونونو استادانو ته په وینا کې وکړې، چې پر مهال یې د رياست الوزارء سیاسي مرستیال مولوي عبدالکبير، د کابینې غړو، له بهر څخه راستانه شوي کدرونو او ګڼ شمېر استادانو ګډون کړی وو. 
د غونډې په پېل کې محترم خیر خواه وویل: هغه استادان چې په وطن کې اوسېږي، هغه ددې وطن اصیل بچیان دي، اوس هغه وخت رارسېدلی چې هېواد له نړۍ سره سیال کړو، موږ د استادانو هر ډول ملاتړ ته ژمن یو، نوی نسل مو باید لومړی عقیدوي زده کړه وکړي، چې وطني او ملي احساس پکې ژوندی شي، تر څو مو هیواد د ترقۍ په لور حرکت وکړي. 
ښاغلي خیر خواه زیاته کړه، چې افغانستان اوس په ډېر ښه وضعیت کې قرار لري، باید د الله تعالی حمد ووایو، چې نن د یو سوچه او اسلامي نظام تر سیوري لاندې راټول شوي یو، په ټوله نړۍ کې بل هېواد ته الله تعالی دا عظیم نعمت نه دی ورکړی، د دنیا ډېر مملکتونه موږ وینو په ځینو مادي برخو کې پر مخ تللي دي؛ خو د استقلال له لوی نعمت څخه بې برخې دي.