د ننګرهار اطلاعاتو او کلتور رياست له لوري د کتاب لوستنې اونۍ ولمانځل شوه
تېره ورځ د ننګرهار ولایت د اطلاعاتو او کلتور رياست او منبر علمي او کلتوري ټولنې له لوري د عيدګاه په عامه کتابتون کې د کتاب لوستنې اونۍ د يوې غونډې په ترڅ کې ولمانځل شوه، چې پکې د پوهنتون استادانو، قومي مشرانو، ځوانانو او د کتاب مينه والو ګډون کړی و.
د غونډې په پیل کې د منبر علمي ټولنې مشر استاد رفيع الله خبرې وکړې او ویې ويل، مطالعه د ولسونو د پرمختګ او ترقۍ کرونده ده، مطالعه په يو قوم او ملت کې د شعور او بېدارۍ جوهر دی.
ورپسې استاد عبدالرحيم صراف د کتاب د مطالعې په اهميت خبرې وکړې او ویې ويل، هغه هېوادونه چې اوس وروسته پاتې دي، د هغوی د وروسته والي لاملونه د کتاب نه لوستل دي.
ورپسې د اطلاعاتو او کلتور رياست د کلتور آمر سید امرالله امېد په ټولنه کې د مطالعې کلتور د کمزوريو په لاملونو او حل لارو هر اړخيزې خبرې وکړې.
همدا ډول د ياد کتابتون مسؤل ضياءالدين همت مل وويل، د کتابخانو لپاره بايد وخت قيد نه وي او رسمي وخت ورته ونه ټاکل شي.
همت مل زیاته کړه، زموږ عامه کتابتون ته اوس د ورځې سلګونه خلک مطالعې لپاره راځي.
د یادونې وړ ده، چې په غونډه کې يو شمېر شاعرانو له لوري برابر شوي ترنمونه او شعرونه هم ګډونوالو ته وړاندې شول.
۱۴۴۴/۱۰/۳۰ هـ ق
۱۴۰۲/۲/۳۰ هـ ش
