په هلمند کې د الحیات په نوم د وینې راټولولو دوهمه دوره کمپاین ترسره شو
تېره ورځ د هلمند ولایت په مرکز لښکرګاه کې د اطلاعاتو او کلتور ریاست اړوند د ځوانانو مدیریت لخوا د الحیات په نوم د وینې راټولولو کمپاین ترسره شو.
د یاد کمپاین پر مهال شاوخوا ۱۲ تنو ځوانانو د لښکرګاه په بست ولایتي روغتون کې د الحیات په نوم د وینې بانک ته ۴۰۰۰ سي سي وینه ورکړه.
د اطلاعاتو او کلتور ریاست د ځوانانو مدیر قاري عبدالباري حنظله وایي، چې د یاد کمپاین لپاره مو ډیرو ځوانانو ته سمینارونه ورکړي، هغوی ته مو د وینې ورکولو پر طبي او شرعي اړخ بشپړ پوهاوی ورکړی چې الحمدالله اوس په سلګونو ځوانان زموږ سره د وینې ورکولو په راجستر کتاب کي نوملیکنه کړې ده.
د وینې راټولولو کمپاین د راجستر کتاب مسئول فیض الله نېکزاد وایي، د وینې ورکولو پروسه په ښه او شفاف ډول روانه ده، په سلګونو ځوانانو د راجستر په کتاب کې نوم لیکنه کړې او هم په انفرادي ډول د هېوادوالو د ضرورت او غوښتنې پر اساس ځوانان وینه ورکوي.
د یادونې وړ ده چې تر دې وړاندې هم په سلګونو ځوانانو د الحیات په نوم د وینې بانک ته وینه ورکړې ده.
۱۴۴۴/۸/۱۱ هـ ق
۱۴۰۱/۱۲/۱۳ هـ ش
