د جهاد د ارزښتونو د ساتنې په نامه ریاست جوړ شو
د اطلاعاتو او فرهنګ وزارت په آډانه کې د افغانستان د خلکو د جهاد د ارزښتونو د ساتنې په موخه ریاست جوړ شو او نن یې په کار پیل وکړ.
د رياست الوزرا په لارښوونه د جهاد د ارزښتونو د ساتنې ریاست د اطلاعاتو او فرهنګ وزارت په تشکیل کې ور زیات شوی او نن یې رسما خپل فعالیت پیل کړی دی.
په هغې غونډه کې چې په همدې مناسبت د اطلاعاتو او فرهنګ وزارت د سرپرست ملا خيرالله خيرخواه په مشرۍ او د دغه وزارت د معينانو او يو شمېر فرهنګي شخصيتونو په ګډون جوړه شوه، په کې د یاد ریاست د فعاليت او څرنګوالي په اړه خبرې وشوې.
په غونډه کې د جهاد د ارزښتونو د ساتنې رياست غړي معرفي شول او په لومړۍ کاري غونډه کې یې د راتلونکو پروګرامونو د جوړولو څرنګوالي په اړه خبرې وشوې.
د دغه ریاست په جوړولو سره به د افغانستان د خلکو د جهاد ارزښتونه په عملي ډول وساتل شي او په ساتنې سره به يې د افغانستان د خلکو د جهاد ارزښتونه، قربانۍ او د هغوى برياليتوبونه راتلونکو نسلونو ته په میراث پاتې شي.
