له قلموالو، فرهنګپالو او فعاله ځوانانو سره د همغږۍ ناسته وشوه

د روزګان اطلاعاتو او فرهنګ ریاست مسؤلینو د دې ریاست په انګړ کې له قلموالو، فرهنګپالو او فعاله ځوانانو سره د همغږۍ ناسته وکړه، چې موخه یې په ټولنه کې د اسلامي او ملي ارزښتونو لا ښه عامول، د سالم فکر پیاوړتیا، د ځوانانو ترمنځ د فکري یووالي رامنځته کول او د فرهنګي فعالیتونو لا پراختیا وه.
په دې ناسته کې ګډونوالو ته د قلم د ارزښت، د رسنیو د اغېزمن رول، د اسلامي او ملي ارزښتونو د ساتنې، د اسلامي نظام د لا پیاوړتیا او د پردیو ناسمو افکارو پر وړاندې د سالم فکر د عامولو په اړه هر اړخیزې خبرې وشوې.
د اطلاعاتو او فرهنګ رئیس مولوي رحمت الله ریحان وویل: د فرهنګي فعالیتونو پراختیا، د ځوانانو هڅونه، د ادبي او فرهنګي پروګرامونو ملاتړ او د فکري ودې لپاره د مناسب چاپېریال رامنځته کول د اطلاعاتو او فرهنګ ریاست له مهمو لومړیتوبونو څخه دي. 
ښاغلي ریحان ځوانان د علم، مطالعې، فکري ودې، ځان جوړونې او هېواد ته د خدمت کولو لور ته وهڅول او ټینګار یې وکړ، چې ځوان نسل باید د خپلو اسلامي او ملي ارزښتونو د ساتنې ترڅنګ د ټولنې په پرمختګ، علمي پرمختیا او فرهنګي پیاوړتیا کې فعاله ونډه واخلي.
دغه راز ګډونوالو ژمنه وکړه، چې د هېواد د آبادۍ، د اسلامي نظام د خدمت، د سالم فکر د ترویج، د فرهنګي ارزښتونو د ساتنې او د فرهنګي فعالیتونو د پیاوړتیا په برخه کې به خپلو هڅو ته دوام ورکړي او د ټولنې فکري او فرهنګي پرمختګ لپاره به په ګډه کار کوي.

۱۴۴۷/۱۲/۲۹ هـ ق