د امام ابوحنیفه رحمه الله د حیرت انګېزه پېښو کتاب لوستنې سیالۍ پایلې اعلان شوې
د اطلاعاتو او کلتور وزارت اړوند د عامه کتابتونونو ریاست له لوري د تنویر فکري او فرهنګي ادارې په همکارۍ د کابل ولایت سروبي ولسوالۍ کې د امام ابوحنیفه رحمه الله د حیرت انګېزه پېښو کتاب لوستنې سیالۍ د ۱۵۰ تنو ځوانانو پایلې اعلان شوې.
د عامه کتابتونونو رئیس دوکتور رفیع الله صمیم ګډونوالو ته د کتاب، مطالعې، عامه کتابتونونو پر ارزښت او فکري جګړې په اړه هر اړخیزه وینا وکړه او زیاته یې کړه، چې د اسلام مبارک دین ته خدمت او د هېواد پرمختګ له مطالعې پرته ناشونی دی، نو اړینه ده چې ځوانان مطالعې ته مخه کړي.
ورپسې د سروبي ولسوالۍ ولسوال ښاغلي قاري محمد عمران د دا ډول فرهنګي پروګرامونو جوړول وستایل او د اطلاعاتو او کلتور وزارت په ځانګړې توګه د عامه کتابتونونو له ریاست څخه یې د ورته نورو سیالیو او پروګرامونو د جوړولو غوښتنه وکړه.
د یادونې وړ ده، چې د غونډې په پای کې د یادې سیالۍ شل تنه مخکښ ګډونوال په بېلابېلو ډالیو سره وستایل شول.
۱۴۴۷/۳/۱۵ هـ ق
