د جهادي ارزښتونو د ساتنې عمومي رئیس د پروان ولایت له مسوولینو سره وکتل
د جهادي ارزښتونو د ساتنې عمومي رئیس مولوی ذبیح الله نوراني او مل پلاوي د پروان ولایت مرستیال والي ابوالوفاء عثماني او د یاد ولایت د اطلاعاتو او کلتور له رئیس مولوي شمس الحق صدیقي سره وکتل.
په پیل کې مرستیال والي ابوالوفاء راغلي پلاوي ته ښه راغلاست ووایه او د جهادي ارزښتونو عمومي ریاست له چارو یې خوښي څرګنده کړه، همدارنګه یې د دې رياست سره په ټولو چارو کې د هر راز مرستې ژمنه وکړه.
ورپسې د جهادي ارزښتونو د ساتنې عمومي رئیس مولوي ذبیح الله نوراني د جهادي ارزښتونو عمومي ریاست د چارو پر اهمیت، اړتیا او د ولایتونو په رول تفصیلي خبرې وکړې؛ ښاغلي نوراني زیاته کړه چې موږ د ټولو جهادي ارزښتونو په راټولولو او راتلونکي نسلونو ته یې د رسولو په برخه کې هلې ځلې کوو.
همدارنګه د پروان د اطلاعاتو او کلتور رئیس مولوي شمس الحق صدیقي وویل: د پروان ولایت د شهیدانو مجاهدینو ډېری سوانح، د هغوی خاطرات او کارنامې مو د اړونده محاذ مشرانو او ډلګۍ مشرانو څخه راټولې کړې دي چې د ځانګړې طرحې او پلان په اساس به یې ځای پر ځای کړو.
په پای کې د پروان ولایت مرستیال والي ابوالوفاء عثماني وویل: په تېر شل کلن امریکایي اشغال کې د شهیدانو مجاهدینو جهادي خاطرات، کارنامې او سوانح راټولول او ساتل خورا مهم کار وباله او په اړوند برخه کې یې د هر ډول مرستې ژمنه وکړه.
۱۴۴۶/۸/۲۵ هـ. س
۱۴۰۳/۱۲/۶ هـ. ل
