کندوز کې لسګونو ځوانانو ته د مطالعې فرهنګ د عامولو په موخه یو ورځنی روزنیز سمینار وړاندې شو
د اطلاعاتو او فرهنګ وزارت اړوند د عامه کتابتونونو ریاست او د کندوز اطلاعاتو او کلتور ریاست په ګډو همکاریو د مطالعې فرهنګ د عامولو په موخه لسګونو شاعرانو، فرهنګیانو، لیکوالانو او ځوانانو ته یو ورځنی روزنیز سیمینار وړاندې شو.
د سیمینار په پیل کې د اطلاعاتو او فرهنګ ریاست مسؤلینو د مطالعې او کتابونو د ارزښت په اړه خبرې وکړې او ویې ویل: مطالعه د فکر ودې، د اخلاقو لوړتیا او د انساني استعدادونو غوړېدو کې بنسټیز رول لري، کتاب د روښانه راتلونکي او یو فعالې ټولنې د جوړېدو بنسټ دی له همدې امله، هر فرد ته پکار ده، چې له کتاب سره مینه پیدا کړي او د مطالعې له لارې خپله علمي کچه لوړه کړي.
مسؤلینو زیاته کړه، د اطلاعاتو او فرهنګ ریاست هڅې کوي چې د عامه کتابتونونو له لارې د مطالعې فرهنګ لا پیاوړی کړي او اوس مهال په کندوز کې په درېیو عامه کتابتونونو کې نږدې شپاړس زره (۱۶۰۰۰) ټوکه بېلابېلو علمي، ادبي او فرهنګي کتابونه شته دي، چې په ورځنۍ توګه د کتاب او مطالعې د مینوال ترې ګټه اخلي.
دغه راز د اطلاعاتو او فرهنګ وزارت اړوند د عامه کتابتونونو مسؤلینو ځوانان د خپل وخت په ګټوره توګه کارولو ته وهڅول او ویې ویل: د هر ملت پرمختګ د ځوان نسل په پوهه او هڅو پورې تړلی دی او پرته له زدهکړو پرمختګ ته رسېدل ناشوني دي.
د سیمینار په لړ کې نورو ویناوالو د اسلام مبارک دین له انده د کتاب لوستنې پر ارزښت د خبرو کولو ترڅنګ ټینګار وکړ، چې اسلام د علم او پوهې دین دی او د زدهکړو او قلم ارزښت په ډېرو آیتونو او احادیثو کې روښانه شوی دی، کتاب لوستنه نه یوازې د فردي ودې سبب ګرځي، بلکې د یوې ټولنې د فکري او معنوي پرمختګ بنسټ هم ټینګوي.
د سیمینار په وروستۍ برخه کې یو شمېر شاعرانو هم خپل ترتیب کړي شعرونه ګډونوالو ته واورول، چې د ګډونوالو له تادوه هرکلي سره مخ شول.
۱۴۴۷/۱۱/۱۰ هـ ق
