کاپیسا کې د رسنیو له مسؤلینو او خبریالانو سره د همږغۍ غونډه وشوه

د کاپیسا ولایت د اطلاعاتو او کلتور ریاست له لوري خبریالانو، د رسنیو له مسؤلینو او یوټيوبرانو سره د همږغۍ غونډه د دې ریاست د ملي راډیو ټلویزیون د آمریت په تالار کې ترسره شوه.
په غونډه کې د اطلاعاتو او کلتور رئیس مولوي کریم الله وثیق، د رسنیو استازو، خبریالانو او یوټيوبرانو ګډون کړی وو.
مولوي کریم الله وثیق وویل: رسنۍ له ځانګړي ارزښت څخه برخمنې دي او د هېوادونو او ټولنو په پرمختګ کې مهم رول لوبوي، نوموړي زیاته کړه؛ د  اسلامي امارت مسؤلین تل له خبریالانو او د رسنیو له مسؤلینو ملاتړ کوي.
نوموړي له خبریالانو او د رسنیو له استازو وغوښتل، چې د خبرونو او راپورونو په چمتو کولو کې اسلامي، مذهبي او ملي ارزښتونو ته پاملرنه وکړي.
د غونډې په پای کې د رسنیو مسؤلینو، خبریالانو او یوټيوبرانو د اطلاعاتو او کلتور له ریاست څخه مننه وکړه او له دې رياست سره يې د لا زیاتو همکاریو ډاډ څرګند کړ.

۱۴۴۶/۸/۴ ق
۱۴۰۳/۱۱/۱۵ ل