کامديش کې د امـارت پېژندنې سيالۍ غوره ګډونوال په ډاليو ونازول شول

د نورستان ولايت د اطلاعاتو او کلتور رياست د ځوانانو چارو امریت له لوري په کامدیش ولسوالۍ کې د امارت پېژندنې علمي سيالۍ ترسره شوې وه، چې د آزموینې پایلې يې د يوې غونډې په ترڅ کې اعلان او لس تنه غوره ګډونوال يې په بېلابېلو ډالیو ونازول شول.
یاده غونډه کې د نورستان د پوهنې رياست تدريسي مرستيال سيد رسول عابد، د ځوانانو چارو آمر، د پوهنې آمر، قومي مخورو، علمای کرامو، د ښوونځیو آمرینو، استادانو او ځوانانو ګډون درلود.
د‌غونډې ویناوالو له اطلاعاتو او کلتور ریاست څخه د مننې ترڅنګ وویل: د ځوانانو د علمي او فکـري وړتیا لوړولو په موخه دا ډول پروګرامونه اړین دي او هیله یې وکړه، تر څو په راتلونکي کې دې ته ورته نور پروګرامونه او سیالۍ هم ترسره شي.
د ځوانانو چارو آمر محمد شعيب مظلوم يار وویل: په ټول توان سره به د ځوانانو د ښې راتلونکې لپاره هڅې کوي.
نوموړي زیاته کړه: د ځوانانو تر منځ د مطالعې دود پياوړي کولو، سالم رقابت رامنځته کولو او د خپلو اسلافو له تاریخه د خبرولو په موخه دا ډول سيالۍ ترسره کوي.
د يادونې وړ ده، چې د يادې سيالۍ لومړي مقام ګټونکي ته کمپیوټر، دویم او درېیم مقام ګټونکو ته مبايلونه او تر لسم مقام پورې غوره ګډونوالو ته بېلابېلې جايزې، او نغدي ډالۍ ورکړل شوې.

۱۴۴۶/۳/۱۹ ھـ ق
۱۴۰۳/۷/۱ ھــ ل