چارواکي: هنرمندان دې د هنر له لارې مثبت پیغامونه خپاره کړي
د خوست د اطلاعاتو او فرهنګ ریاست مسوولین له هنر مندانو غواړي چې د خپلو هنرونو له لارې په ټولنه کې د سولې او یووالي پیغامونه خپاره کړي.
د باختر اژانس د سیمه ييز خبریال د خبر له مخې، د خوست د اطلاعاتو او فرهنګ رییس محمد انور زاهد د هنر د نړیوالې ورځې په نمانځغونډه کې وویل چې د هنر هرې برخې ته یې ځانګړې پاملرنه کړې او لا هم دغه لړۍ دوام لري.
هغه هنرمندانو ته د همکارۍ ډاډ ورکړ او له دوی یې وغوښتل چې د خپلو هنرونو له لارې مثبت او د یووالي پیغامونه خپاره کړي.
په همدې حال کې د متون ښاروالۍ د ښاري حکومتوالۍ امر محمد الله شېرزي وویل چې هنر د ټولنې په ټولو برخو کې شامل او اړتیا ورته لېدل کېږي او کله چې یو ښه مدیر د کارمندانو سره له مدیریتي هنر څخه کار واخلي نو په ډاډ سره وایم چې هغه مدیر به کامیاب او د خپل هنر په استعمال سره به یې په کم وخت کې زیات کار ترسره کړی وي.
په ورته وخت کې د هنرمندانو په استازیتوب د موسیقۍ د برخې مشر ګل رووف شوقي وايي چې د اطلاعاتو او فرهنګ ریاست په همکارۍ او لارښوونه یې هڅې پیل کړې چې د سندرو او شعرونو له لارې د سولې، ورورګلوۍ او ثبات پیغامونه خپاره کړي.
د یادونې وړ ده چې په نمانځغونډه کې ځوانو شاعرانو د خپلو او نورو شاعرانو د شعرونو اورولو سربېره، تمثیلي ټوټې او انځورګري هم نندارې ته وړاندې کړل.
متون / د تلې ۱۶ مه / باختر