په کندهار کې د سرور کائنات صلی الله علیه وسلم په منقبت کې شانداره نعتیه مشاعره ترسره شوه

د کندهار ولایت په اطلاعاتو او کلتور ریاست کې د سرور کائنات صلی الله علیه وسلم په منقبت کې شانداره نعتیه مشاعره ترسره شوه، چې پکې  د یاد ریاست رئیس مولوي انعام الله سمنګاني، د ښاروالۍ مرستیال مولوي قدرت الله وصال، د کندهار پوهنتون رئیس مولوي اکرم شاه عاصم، اداري مسؤلینو، شاعرانو، ادیبانو او عامو خلکو ګډون کړی و.
په پیل کې ښاغلي سمنګاني خبرې وکړې او ویې ویل، چې اوس زموږ په هېواد کې ازادي، امنیت او یو اسلامي نظام قائم شوی او شرعي امير هم لرو چې په ټول هېواد کې پوره واک لري، نو تر بل هر وخت ډېر دلته شرعي ارزښتونو ته اعتبار ورکول کیږي. 
ښاغلي سمنګاني زیاته کړه، چي د رسول الله صلی الله علیه وسلم پیروي زموږ ویاړ ده، باید هر وخت د رسول الله صلی الله علیه وسلم ارشادات او سنت په خپل ژوند کې عملي کړو، تر څو په دنیا او اخرت کې کامیابي تر لاسه کړو. 
همدا رنګه د ښاروالۍ مرستیال ښاغلي وصال بیا په خپلو خبرو کي وویل: د رسول الله صلی الله علیه وسلم اخلاق او صفات بي شمېره دي، په ژوند کې یې د مسلمانانو او کفارو سره اخلاق او کړه وړه بې ساري دي، هغه غوښتنه وکړه، چې باید په خپل ټول ژوند کې د رسول الله صلی الله علیه وسلم سنت عملي کړو.
وروسته د مشاعرې په برخه کي شاعرانو او نعت ویونکو د رسول الله صلی الله علیه وسلم پر ژوند، اخلاقو او صفاتو بېلا بیل نعتونه او شعرونه وویل.

۱۴۴۵/۳/۶ هـ ق
۱۴۰۲/۶/۳۰ هـ ش