په کاپیسا ولایت کې د چهارمغز جشن جوړ شو

د کاپيسا ولايت د اطلاعاتو او کلتور رياست د سيمه ييزو مسوولينو، علماوو، فرهنګيانو، شاعرانو، ليکوالانو او ځوانانو په ګډون په نجراب ولسوالۍ کې د چهارمغز جشن جوړ کړ.
د اطلاعاتو او کلتور رئيس مولوي کريم الله وثيق د غونډې ګډونوالو ته د ښه راغلاست تر څنګ د دغه جشن په اړه خبرې وکړې او ويې ويل: کاپيسا ښکلې آب و هوا لري او په دې خاوره کې د لوى خداى (ج) زيات نعمتونه شته، کاپيسا ته هر کال ګڼ شمېر خلک د طبيعي منظرو د ليدو لپاره راځي.
ښاغلي وثیق د دغه جشن هدف د هیواد د ښکلاګانو معرفي کول یاد کړل او زیاته یې کړه: دا ډول جشنونه د هیواد په اقتصادي وده او پرمختګ کې مهم رول لوبوي.
ورپسې د نجراب ولسوالۍ مرستيال مولوي مقدس احمدي وویل: د نجراب ولسوالي ښکلې دره او خوندورې میوې لري، چې چهارمغز د دې ولسوالۍ یوه له ځانګړو میوو څخه ده، نوموړي د اطلاعاتو او کلتور له رياست څخه مننه وکړه، چې دا ډول جشنونه جوړوي.
د یادونې وړ ده، چې د جشن په پای کې شاعرانو خپل شعرونه او ليکوالانو خپلې مقالې د جشن ګډونوالو ته واورلې.

۱۴۴۶/۴/۷ هـ ق
۱۴۰۳/۷/۱۹ هـ ل