په سرپل کې د (اسلام او دیموکراسۍ) ازموینې غوره ګډونوال وستایل شول
د سرپل ولایت د اطلاعاتو او کلتور ریاست د ځوانانو د ديني زده کړو د پراختیا او د دیموکراسۍ د اهدافو د پېژندلو په موخه د (اسلام او دیموکراسۍ) تر سرلیک لاندې یوه علمي ازموینه ترسره کړې وه، چې پایلې یې اعلان او غوره ګډونوال د ډاليو په ورکولو سره وستایل شول.
د اطلاعاتو او کلتور رئیس ملا عبدالغفار حقنما د اسلامي ټولنې د پرمختګ او د ځوانانو د مسؤلیتونو په اړه خبرې وکړې او ټینګار یې وکړ، چې ځوانان باید د علم او پوهې په ترلاسه کولو سره خپل دین او ټولنې ته خدمت وکړي، نوموړي وویل: دا ډول پروګرامونه د ځوانانو د فکري ودې او د علمي سطحې د لوړولو لپاره یوه ارزښتناکه موقع ده.
د سرپل د علماوو شورا غړي شیخ فیضالله فایز وویل: ځوانان باید د اسلامي تربیې او د لوېدیځې دیموکراسۍ پېژندنې سره خپله لار د قرآن کریم او نبوي سنتو مطابق وټاکي، نوموړي زیاته کړه؛ باید هڅه وشي، ترڅو ځوانان له منحرفو افکارو او هغو وارداتي کلتورونو څخه وساتل شي، چې له اسلامي ارزښتونو سره په ټکر کې دي.
د اطلاعاتو او کلتور ریاست د ځوانانو چارو آمر فیضالله فایز د دې سیالۍ هدف د ځوانانو علمي او فکري وده وبلله او له هغوی یې وغوښتل، چې خپل وخت د ناسالمو بوختیاوو پر ځای د ديني او علمي پوهې د ترلاسه کولو لپاره وکاروي.
د يادونې وړ ده، چې د ازموینې غوره ګډونوالو ته لپ ټاپ کمپیوټرونه، موبایلونه او نغدي ډالۍ ورکړل شوې.
۱۴۴۶/۸/۲ ق
۱۴۰۳/۱۱/۱۳ ل
