پروان کې د ناسمو رواجونو د مخنیوي په هکله غونډه وشوه
د پروان ولایت د اطلاعاتو او کلتو ریاست له لوري د ناسمو رواجونو د مخنیوي په هکله د عالیقدر امیرالمومنین حفظه الله تعالی د فرمان پلي کولو په اړه غونډه وشوه، چې پکښې د یاد ولايت والي مفتي محمد ادریس انوري، دیني عالماوو، قومي مشرانو، ځوانانو او د بېلابېلو ولایتي ادارو مسؤلینو ګډون کړی وو.
غونډې ته د وينا پرمهال د اطلاعاتو او کلتور رئیس مولوي شمس الحق صدیقي د ناسمو رواجونو په اړه د ۱۷ مې ګڼې فرمان په اړوند هر اړخیزه وینا وکړه او د غونډې له ګډونوالو او د رسنیو له مسؤلینو یې وغوښتل، چې ولسونو ته د دغه فرمان د رسولو او دغه راز د عملي تطبیق برخه کې نه ستړې کیدونکې هڅې وکړي.
ښاغلي صدیقي زیاته؛ الحمدالله موږ او تاسو مسلمانو یو، نو ژوند باید د شریعت مطابق وکړو، او د امیرالمومنین حفظه الله تعالی د اطاعت تر څنګ باید د هغه د فرمانونه تطبیق په ځان لازم وکڼو.
همدا راز د پروان والي مفتي محمد ادریس انوري د اسلامي امارت د مشرتابه د فرمان څخه هرکلی وکړ او ويې ویل: یوازینی دین چې د انسانانو د ژوند ټول موضوعات او قوانین پکې شامل دي، هغه مقدس اسلام دی، د الله تعالی د قانون هدف پر ځمکه باندې عدالت او انصاف دی، چې د ټولو خلکو د حقونو د تامین سبب ګرځي، مسلمانانو ته لازمه ده، چې د الله ج فرامين او اسلامي قانون په خپل ژوند کې عملي کړي او د الله تعالی او رسول الله صلی الله علیه وسلم د اسلامي شریعت اطاعت وکړي.
د یادونې وړ ده، چې په غونډې کې ګډونوالو قومي مشرانو ځوانانو د امیرالمومنین دغه فرمان له صادریدو څخه مننه وکړه او د دې فرمان په عملي کولو کې يې د همکارۍ ډاډ ورکړو.
۱۴۴۶/۱۰/۲۶ ق
