پروان کې د امارت پېژندنې سترې سیالۍ د ازموینې پایلې اعلان شوې
د پروان ولایت اطلاعاتو او کلتور رياست له لوري د پوهنې ریاست سره په همغږۍ د یاد ولایت د جبل السراج ولسوالۍ د بیلابیلو ښوونځیو او مدارسو له ۶۰۰ تنو زده کوونکو څخه د امارت پېژندنې کتاب کې د اخستل شوې سیالۍ د آزموینې پایلې اعلان او غوره ګډونوال د جوایزو په ورکولو وستایل شول.
د اطلاعاتو او کلتور رئيس مولوي شمس الحق صدیقي د وینا پر مهال ځوانان تعلیم او تحصیل ته وهڅول او ځوانانو ته یې په خطاب کې وویل: چې د ټولنې ځوان قشر باید د هیواد د آبادۍ او پرمختګ فکر ولري، همدا راز دا هیواد تاسو ځوانانو ته اړتیا لري، هڅه وکړئ، ترڅو د دې هیواد د خدمت جوګه وګرځئ.
ورپسې د پوهنې رئيس مولوي سید محمد فیضي ځوانانو ته په خطاب کې وویل: ژوند مو باید په اسلامي اصولو سمبال وي، ځکه د اسلامي اصولو پابندي د بريالي ژوند تضمين دی، ځوانان باید ډير وخت په زده کړو ترلاسه کولو تير کړي، ځکه د نن ځوانان د سبا ورځې رهبران دي.
د ځوانانو چارو آمر حمدالله دانش ځوانانو ته ډاډ ورکړ، چې د یادې سیالۍ آزموینه او پایله په ښه توګه ترسره شوي او پايلې يې په پوره شفافيت سره اعلان شوي دي.
د غونډيو په وروستيو شيبو کې د امارت پېژندنې علمي سيالۍ ۲۰ تنه غوره ګډونوال د بېلابېلو جايزو په ورکولو سره وستايل شول.
۱۴۴۶/۳/۱۹ هـ ق
۱۴۰۳/۷/۱ هـ ل
