پروان ولایت کې سل تنه ځوانانو ته پنځلس ورځنی ورکشاپ پیل شو
دو شنبه (۲۷ د شوال المکرم ۱۴۴۵) د پروان ولایت اطلاعاتو او فرهنګ ریاست له لوري نزدې سل تنه ځوانانو ته د لومړنیو روغتیایي مرستو ۱۵ ورځنی ورکشاپ پیل شو.
اطلاعاتو او فرهنګ ریاست د ځوانانو چارو آمر حمدالله دانش د یاد ورکشاپ موخه په روغتیایي برخو کې د ځوانانو ظرفیت لوړونه یاده کړه او ویې ویل: یاد روزنیز ورکشاپ به پنځلس ورځې دوام وکړی،چې په ترڅ کې به یې ګډونوال د لومړنیو روغتیایي مرستو په ارزښت پوه او په علمي چارو کې په پلي کولو برلاسي شي.
نوموړي زیاته کړه؛ چې هڅه کوي ترڅو د ځوانانو او زده کوونکو لپاره لا ډېرې ښوونيزې برنامې جوړي کړي.
د یاد ورکشاپ مخته وړونکي ډاکټر محمد شعیب امین زاده د اطلاعاتو او فرهنګ ریاست څخه مننه وکړه،چې د داسې مثبتو او ارزښت لرونکو برنامو د پلي کېدو لپاره زمینه برابروي او ډاډ یې ورکړ،چې پوره هڅه کوي ترڅو پنځلسو ورځو کې د موضوع اړوند ټولې برخې تدریس کړي.
د ورکشاپ یو شمېر ګډون وال د اطلاعاتو او فرهنګ ریاست یاد نوښت ستایي او د داسې برنامو جوړول د ځوانانو ظرفیت او پوهاوي لوړولو کې خورا اړین بولي.
۲۰۲۴/۵/۶/ ميلادي
۱۴۰۳/۲/۱۷ ھ ش
