هلمند کې له فرهنګي او قلموالو ځوانانو سره د همغږۍ غونډه وشوه

د هلمند ولایت د اطلاعاتو او کلتور ریاست له لوري لښکرګاه ښار فرهنګي مرکز کې له ګڼ شمېر فرهنګي او قلموالو ځوانانو سره د همغږۍ غونډه وشوه.
د اطلاعاتو او کلتور رئيس حافظ عبدالباري راشد د غونډې ګډونوالو ته د ښه راغلاست ترڅنګ وويل: مبارزه په دوو (فزیکي او فکري) ډولونو کیږي، نظامونه په فزيکي مبارزې ګټل کيږي او د فکري مبارزې په مټ ساتل کيږي،  اوس مهال د نظام د بقاء په موخه فکري مبارزه اړینه ده، په فکري او قلمي مبارزه کې يووالی ډېر اړين دی، نو پر همدې اساس د مبارزې ترڅنګ بايد ټول قلموال د یو بل ترڅنګ د غربي فکري جګړې پر وړاندي په يو غږ ودريږي او د اسلامي ارزښتونو دفاع وکړي.
د غونډې په لړ کې یو شمېر نورو مسؤلینو وویل: د خوښۍ ځای دی، چې په يو غږ او یووالي سره هلمندي قلموال او فرهنګي ځوانان راټول شوي او د خپلې مبارزې د لا ټينګښت او ځواک لپاره د يو او بل نظرونه او وړانديزونه اوري، مسؤلینو له ټولو قلموالو او فرهنګي ځوانانو څخه وغوښتل، چې خپله مبارزه دوامداره او خپل قلمونه د اسلامي ارزښتونو په ساتلو کې تاند وساتي.
فرهنګي او قلموالو ځوانانو خپل نظرونه، وړانديزونه، او ستونزې شريکې کړې او ټولو په کلک هوډ سره د فکري مبارزې د دوام ژمنه وکړه.
د غونډي په وروستيو کې د اطلاعاتو او کلتور رياست رهبرۍ له لوري فرهنګي او قلموالو ځوانانو ته ستاينليکونه او مادي ډالۍ هم ورکړل شوې.

۱۴۴۷/۶/۱ هـ ق