هلمند کې له رسنیو سره د همږغۍ میاشتنۍ غونډه تر سره شوه

د هلمند ولایت د اطلاعاتو او کلتور ریاست له لوري د یاد رياست د رئیس حافظ عبدالباري راشد په مشرۍ د سیمه ییزو رسنیو مسؤلینو او خبریالانو سره د همږغۍ میاشتنۍ غونډه تر سره شوه. 

د غونډې په پیل کې ښاغلي راشد ټولو ګډونوالو ته د ښه راغلاست تر څنګ وویل: د افغانستان اسلامي امارت د نافذه قوانینو او افغاني کلتور سره سم ژمن یو، چې د رسنیو سره همکاري وکړو، د ده په خبره چې اسلامي، افغاني او ملي ارزښتونه لومړیتوب دی او د دې ارزښتونو په رڼا کي باید رسنۍ او خبريالان خپل ملي مسؤلیت ادا کړي.

نوموړي زیاته کړه؛ زموږ غوښتنه د رسنیو له مسؤلینو او د رسنیو له استازو څخه دا ده چې د خپلو رسنیو له لاري د ځوانانو د فکري روزنې په نوم د ځوانانو د اصلاح په موخه خپروني جوړې کړي، تر څو مو په چارو کي لا زیات نوښت او پرمختګ را منځته شي.

وروستیو کې د رسنیو مسؤلینو او خبریالانو په نوبتي توګه خبريېوکړې او خپلې ستونزې او غوښتنې یې شریکي کړې، چي د اطلاعاتو او کلتور رياست د مسؤلينو له لوري د ستونزو د حل په موخه د پوره همکارۍ ډاډ ورکړل شو.

۱۴۴۶/۶/۲۶ هـ ق

۱۴۰۳/۱۰/۸ هـ ل