هلمند کې د قلموالو، د رسنیو مسؤلينو، خبریالانو او شاعرانو تر منځ ناسته وشوه

د هلمند ولایت د والي مولوي عبدالرحمن مسلم کندوزي په کوربتوب، د قلموالو، د رسنیو مسؤلينو، خبریالانو او شاعرانو تر منځ د روژه ماتي پر مهال ګډه ناسته وشوه.
د ناستې په ترڅ کې د هلمند والي ښاغلي مسلم د ټولنې په هر اړخیزه اصلاح کې د رسنیو په ځانګړي ډول د لیکوالانو او شاعرانو رول زیات مهم وګڼه او په دې اړه یې بېلا بېل موارد تشریح کړل.
د نوموړي په وینا؛ غواړي د ویاندویانو او رسنیو د مسؤلينو ترمنځ د ګډو ناستو په جوړولو سره هغوی ته دا فرصت برابر کړي، چې د همکارۍ او همږغۍ د پراختیا لپاره خپل نظرونه او وړاندیزونه شریک کړي.
د اطلاعاتو او کلتور رئیس حافظ راشد هلمندي وویل: اسلامي امارت د اسلامي اصولو په چوکاټ کې د رسنیو او د بیان د ازادۍ ملاتړی دی او تل دا هڅه کوي، ترڅو د رسنیو او امارتي ادارو ترمنځ د تعامل او همکارۍ فضا لا پیاوړې شي. 
نوموړي د هېواد د ابادۍ او پرمختګ لپاره د دولت، ملت او رسنیو ترمنځ پر ګډ کار ټینګار وکړ او ویې ویل: رسنۍ د ملت او دولت ترمنځ د پله حیثیت لري، د دولت لارښوونې تر ولس او د ولس غوښتنې تر مسؤلينو رسوي، چې دا چاره د دوی ترمنځ د همکارۍ فضا پراخوي او په چارو کي د شفافیت لامل کېږي.

۱۴۴۶/۹/۲۲ ق
۱۴۰۴/۱/۲ ل