هلمند کې د فکري روزنې سیالۍ مخکښ ګډونوال وستایل شول

د هلمند ولایت سنګین ولسوالۍ عامه کتابتون کې د اطلاعاتو او کلتور ریاست له لوري د الرباط فکري او فرهنګي ادارې او پوهني ریاست په ګډه همکاریو د فکري روزنې سیالۍ مخکښ ګډونوال وستایل شول.
د اطلاعاتو او کلتور ریاست اړوند د اطلاعاتو امر وویل: دا ډول سیالۍ د ځوانانو د فکري جوړښت لپاره خورا اغیزمني دي او د اطلاعاتو او کلتور ریاست په پام کې لري، چې هلمند کې د ځوانانو فکري روزنې په موخه دې ته ورته نورې سیالۍ هم جوړې کړي.
دغه راز په غونډه کې ویناوالو د علم ترلاسه کولو پر ارزښت هراړخیزې خبرې وکړې او د ځوانانو لپاره یې دا ډول سیالۍ جوړول خوار ګټورې وبللې، ویناوالو زیاته کړه، چې د دې سیالیو په وسیله د ځوانانو د پوهې کچه لوړیږي، هڅول کیږي، د اسلامي نظام په اړه یې معلومات زیاتیږي او د فکري یرغل د مخنیوي په لارو چارو پوهیږي.
د یادونې وړ ده، چې د سیالۍ لومړي مقام او دویم مقام ګټونکي ته کمپیوټرونه، دریم، څلورم او پنځم مقام ګټونکو ته الفجر ساعتونه او نورو مخکښو زده کوونکو او د سیالۍ ترتیب کوونکو ته بېلابېل معنوي او مادي ډالۍ ورکول شول.
۱۴۴۷/۵/۲۸ هـ ق