هرات کې (د ساده مهارتونو له لارې د انلاین عاید ترلاسه کول) سیمینار جوړ شو
د هرات ولایت د اطلاعاتو او کلتور ریاست اړوند د ځوانانو چارو آمریت له لوري (د ساده مهارتونو له لارې د انلاین عاید ترلاسه کول) په نوم ۱۰۰ تنو ځوانانو ته علمي او معلوماتي سیمینار جوړ شو.
د اطلاعاتو او کلتور ریاست اړوند د ځوانانو چارو آمر وویل: یاد سمینار ځوانانو ته له پانګې څخه بغیر له مشروع او قانوني لارو د انلاین کار په وسیلې د عاید ترلاسه کولو زمینې برابرولو په موخه وړاندې شو، ترڅو ځوانان له کمپیوټري زده شویو مهارتونو څخه په موثره توګه ګټه واخلي.
د ځوانانو چارو د آمر په وینا: په دې سمینار کې ګډونوالو ته د عصري مهارتونو، په ځانګړي ډول د فریلانسینګ په اړه هر اړخیز معلومات وړاندې شول او ځوانان وهڅول شول، چې له دغو مهارتونو څخه د عاید ترلاسه کولو لپاره استفاده وکړي، ترڅو وکولای شي هم د ځان او هم د خپلو کورنیو اقتصادي ملاتړ وکړي.
ورته مهال د سیمینار ګډونوالو وویل: په سیمینار کې وړاندې شوي معلومات د انلاین کار د پیل او عاید ترلاسه کولو لپاره ډېر ګټور او عملي وو، د دوی په وینا، مخکې له دې له انلاین فرصتونو او ډیجیټلي مهارتونو سره کم بلد وو، خو دا مهال یې د زده کړې او فعالیت لپاره انګېزه او پر ځان باور زیات شوی دی.
د یادونې وړ ده، چې تر دې وړاندې هم په همدې برخو کې درې روزنیز ټولګي جوړ شوي وو، چې د مسئولینو په وینا؛ مثبتې او ګټورې پایلې یې لرلې.
۱۴۴۷/۶/۲۵ هـ ق
