مقدمه یی بر تدوین استراتیژى " کتاب مخکتنه وشوه
“مقدمه یی بر تدوین استراتیژى با تاکيد بر منافع ملى افغانستان " کتاب نن په کابل کې مخکتنه وشوه.
د دغه کتاب ليکوال د کورنيو چارو وزارت پخوانى وزير سترجنرال مجتبى پتنګ دى.
د باختر آژانس د خبر له مخې؛ د دغه کتاب د مخکتنې په غونډه کې د اثر ليکوال مجتبى پتنګ وويل: په دغه کتاب کې د بې ثباتۍ اصلي عوامل، د ټولنې په پرمختګ کې د ستراتيژۍ ارزښت، د ستراتيژۍ نشتوالى، د ستراتيژۍ ارزښت او په افغانستان کې د ستراتيژيو ناخوالى بيان شوى دى.
په دې غونډه کې د اطلاعاتو او فرهنګ وزارت نوماند وزير او سرپرست محمد طاهر زهير وويل: د ستراتيژۍ نشتوالى په افغانستان کې يوه ستره ستونزه ده او د دغه کتاب خپرېدل کولاى شي د سترو ملي او فرهنګي ستراتيژيو په رامنځته کولو کې ارزښتناک رول ولري.
د زهير د څرګندونو له مخې؛ په هېواد کې سياسي او پوځي فضا د توطيې پر تيوري بنا شوې ده او دغه شان ستراتيژۍ کولاى شي د دغه شان توطيو په ځپلو کې مرسته وکړي.
هغه زياته کړه چې د ټولنو پرمختيا په فرهنګ کې ريښه لري او د دغه کتاب خپرېدل کولاى شي د فرهنګ په پياوړتيا او د لوستلو په رواجولو کې مرسته وکړي.
د اطلاعاتو او فرهنګ وزارت سرپرست څرګنده کړه چې ستراتيژۍ د دښمن په پېژندلو کې زياته مرسته کوي.
په غونډه کې د اطلاعاتو او فرهنګ وزارت پخواني وزير سيد مخدوم رهين وويل چې دولتونه د ستراتيژۍ لرلو او د ستراتيژۍ ارزښت ته اړتيا لري. د هغه په باور؛ د دولت په ستراتيژۍ کې اړتيا ده چې د تروريزم پر ضد فرهنګي مبارزه په پام کې ونيول شي.
د " مقدمه یی بر تدوین استراتیژى با تاکيد بر منافع ملى افغانستان " کتاب ٣ فصلونه او ٣١٧ مخونه لري چې (مرکز مطالعات ثبات پايدار) خپور کړى دى.
کابل / د تلې ۹ مه / باختر
