لغمان کې د مطالعې د کلتور دود کولو او پیاوړتیا په موخه غونډه وشوه

د لغمان ولایت د اطلاعاتو او کلتور ریاست اړوند عامه کتابتون تالار کې د مطالعې د کلتور د دود کولو او پیاوړتیا په موخه غونډه وشوه، چې پکې د اطلاعاتو او کلتور ریاست مسؤلینو، شمېر استادانو او زده کوونکو ګډون کړی وو.
د اطلاعاتو او کلتور ریاست مسؤلینو د مطالعې کلتور دود کولو او پیاوړتیا په اړه خبرې وکړې او ویې ویل: د اطلاعاتو او کلتور ریاست د مطالعې د کلتور د دود کولو او پیاوړتیا لپاره هلې ځلې کوي.
دغه راز مسؤلینو د عامه کتابتون په اړه هر اړخیز معلومات وړاندې کړل او ویې ویل: کتابتون د مطالعې ځای دی، ټول ځوانان باید هڅه وکړي چې کتابتون ته د مطالعې لپاره راشی او خپل وخت د علم په زده کولو کې تېر کړي.
ورته مهال استادانو او زده کوونکو د اطلاعات او کلتور ریاست څخه د مننې کولو ترڅنګ د ورته نورو پروګرامونو د جوړولو غوښتونکي شول.
۱۴۴۷/۶/۲۴ هـ ق