لغمان کې د حکومتي او خصوصي رسنیو له مسؤلینو سره د همغږۍ ناسته ترسره شوه

لغمان کې د حکومتي او خصوصي رسنیو له مسؤلینو او خبریالانو سره د همغږۍ ناسته ترسره شوه، په یاده ناسته کې د اطلاعاتو او کلتور رئیس مولوي عبدالنور رسولي، د ولایت مقام ویاند مولوي سلامت خان بلال د ملي راډیو تلویزیون آمر محمد طاهر صافي، د اطلاعاتو آمر عتیق الله قریشي، د محلي او نورو رسنیو مسؤلینو برخه درلوده.
په پیل کې ښاغلي رسولي د رسنیو پر ارزښت خبرې وکړې او زیاته یې کړه، په دغه ولایت کې د رسنیو وضیعت ورځ تربله په ښه کېدو دی، اطلاعاتو ته لاس رسی اسانه شوی دی، د پخوا په پرتله راډیو ګانو او نورو رسنیو ته د فعالیت ښه زمینه برابره ده.
نوموړي همداراز د رسنیو مسؤلینو ته سپارښتنې وکړې چې خپل نشرات به د افغاني او ملي ارزښتونو په پام کې نیولو سره پرمخ وړئ.
ورپسې د رسنیو مسؤلینو خپلې ستونزې، پرمختګونه او لاسته راوړنې له ګډونوالو سره شریکې کړې، هغوی د اطلاعاتو او کلتور ریاست څخه مننه وکړه، چې میاشت په میاشت ورسره د همغږۍ غونډه کوي او د فعالیتونو ستاینه یې کوي.

۱۴۴۵/۳/۱۹ هـ ق
۱۴۰۲/۷/۱۲ هـ ش