فاریاب کې له دولتي او خصوصي رسنیو سره د همغږۍ غونډه جوړه شوه
د فارياب ولايت د اطلاعاتو او کلتور رياست په انګړ کې د دولتي او خصوصي رسنيو او خپلواکو خبريالانو ترمنځ د همغږۍ او همکارۍ په موخه غونډه جوړه شوه.
په دې غونډه کې د اطلاعاتو او کلتور رئيس مولوي شمس الدين محمدي وويل: د فاریاب ولايت د سيمه ييزو رسنيو له مسوولينو څخه هيله لرو، چې د سيمه ييزو ادارو فعاليتونه او لاسته راوړنې په پوره صداقت او امانتدارۍ سره تر پوښښ لاندې راولي، د نوموړي په وينا؛ رسنۍ کولاى شي، چې د خلکو اصیل کلتور او پوهاوی ته وده ورکړي.
همدا راز د اطلاعاتو آمر غلام محمد کريمي د غونډې ګډونوالو ته د خبريالانو لپاره د کارتونو د چاپولو، د غږيزو، تصويري ،چاپي رسنيو او يوټيوبرانو لپاره د جواز په اړه مفصل معلومات وړاندې کړل.
ورپسې د فارياب د خبريالانو د مصوونيت د کمېټې مشر ازاد بيک رسولي د ازادو خبريالانو په استازيتوب خپلې ستونزې او ننګونې وړاندې کړې او له مسوولينو څخه يې د اطلاعاتي دندو د ترسره کولو لپاره د ښه شرايطو او اسانتياوو د برابرولو غوښتنه وکړه او د اطلاعاتو او کلتور رياست له دايمي همکارۍ څخه يې خوښي څرګنده کړه.
۱۴۴۶/۳/۲۹ هـ ق
۱۴۰۳/۷/۱۱ هـ ل
