غزني کې سلګونو ځوانانو ته عقیدوي سیمینار پیل شو
د غزني ولایت د اطلاعاتو او فرهنګ ریاست له لوري د دغه ولایت سلګونو ځوانانو ته په یاد ریاست کې عقیدوي سیمینار پیل شو.
د غزني د اطلاعاتو او فرهنګ رئیس ملا حمیدالله نثار وویل: د دغه ریاست د ځوانانو آمریت د کلمات علمي او څېړنیزې ادارې په همکارۍ، ځوانانو ته د دیني، عقیدوي، فرهنګي او فکري زدهکړو زمینه برابره کړې ده.
نوموړي زیاته کړه، چې د یووالي او ورورولۍ ساتنه، د ناوړه او ناسمو تبلیغاتو پر وړاندې مبارزه د ټولو افغانانو ګډ مسوولیت دی او باید د یووالي د پیاوړتیا او د نظام د ټینګښت لپاره هڅې وشي.
همداراز، د یاد ریاست مسؤلینو وویل: په دغه سیمینار کې به سلګونو ځوانانو ته د نږدې درېیو میاشتو په موده کې د دیني او عصري علومو د دوو مجربو استادانو له لوري زدهکړې ورکړل شي.
د مسؤلینو په وینا؛ د ځوانانو د علمي کچې لوړول، د استعدادونو پېژندل او د هغوی عقیدوي او فکري اصلاح د دغه سیمینار د جوړېدو له موخو څخه دي.
نېټه: ۱۴۴۸/۴/۲۰ هـ ق
