شانتي رضاکاره ټولنه په نورستان کې عامه کتابتونونه جوړوي
د اطلاعاتو او کلتور وزارت د عامه کتابتونونو رئيس حافظ نعمت الله منتظر او د شانتي رضاکاره ټولنې مسؤلينو نورستان ولايت ته د سفر پرمهال د اطلاعاتو او کلتور رياست له رئيس مولوي سميع الحق حق بیان سره ليدنه وکړه.
د کتابتونونو عمومي رئیس حافظ نعمت الله منتظر وويل: د شانتي رضاکاره ټولنه په پام کې لري، چې د نورستان په مرکز پارون او کانتيوا او واما ولسواليو کې د کتاب لوستنې دود عامولو په موخه عامه کتابتونونه جوړ کړي.
د نورستان د اطلاعاتو اوکلتور رئیس مولوي سميع الحق حق بیان میلمنو ته د ښه راغلاست ویلو ترڅنګ د خپلو فعاليتونو، پروګرامونو، عامه کتابتون کې د شته کتابونو او راتلونکو پلانونو او پرمختګونو په اړه معلومات ورکړل.
هغه زیاته کړه؛ د نورستان عامه کتابتون کې ډېر کم کتابونه موجود وو، چې د ډېرو هلو ځلو وروسته مو د پخوا په پرتله پراختیا ورکړې، اوس مهال مختلفو برخو کې کتابونه موجود دي، چې ګڼ شمېر محصلین او زده کوونکي ترې استفاده کوي.
ښاغلي حق بیان د شانتي رضاکاره ټولنې مسؤلینو څخه د مننې کولو ترڅنګ دوی ته د هر ډول همکارۍ ډاډ ورکړ.
۱۴۴۶/۴/۳ هـ ق
۱۴۰۳/۷/۱۵ هـ ل
