سمنګان کې د امارت پېژندنې سيالۍ غوره ګډونوال وستايل شول

د سمنګان ولايت د اطلاعاتو او کلتور رياست اړوند د ځوانانو چارو آمريت له لوري له شاوخوا ۴۰۰ تنو زده کړيالانو، زده کوونکو او ځوانانو څخه د امارت پېژندنې سيالۍ ازموینه اخېستل شوې وه، چې پايلې يې د ځايي مسؤلینو او د سيالۍ د ګډونوالو په شتون کې اعلان او لس تنه غوره ګډونوال يې د ډاليو په ورکولو وستایل شول.
د هنر او فرهنګ آمر عبدالخلیل جاوید وویل: ټولنه هغه وخت پرمختګ کوي، چې ځوان قشر له کتاب لوستنې سره علاقه ولري او خپل وخت په تعليم ترلاسه کولو مصرف کړي، په اسلامي ټولنه کې د مطالعې په برخه کې سيالۍ ترسره کول، د ځوان قشر ديني روحيه تقويه کوي او له دوی سره مرسته کوي، چې په سم درک سره ديني مسايلو ته لاسرسی ولري.
 د یادونې وړ ده، چې د اطلاعاتو او کلتور رياست له لوري لومړي مقام ګټونکي ته کمپيوټر، دوهم مقام ګټونکي ته موبایل، دريم مقام ګټونکي ته لاسي ساعت او تر لسم مقام ګټونکو پورې لباسونه ووېشل شول.

۱۴۴۶/۵/۱۰ هـ ق
۱۴۰۳/۸/۲۲ هـ ل