سرپل کې وياندویانو او مطبوعاتي مسؤولينو ته جوړ شوی ښوونيز سيمينار ترسره شو
د سرپل ولايت د اطلاعاتو او کلتور رياست له لوري ددې ولايت د دولتي ادارو مطبوعاتي مسؤولينو او وياندویانو ته جوړ شوی درې ورځنی ښوونيز سيمينار ترسره شو.
یاد سيمينار د دولتي ادارو د مطبوعاتي مسؤولينو او وياندویانو د مسلکي کولو لپاره د راپور ليکنې، تصوير اخستنې او د اطلاعاتو د خپرولو په برخه کې د مسلکي زده کړو ورکولو لپاره جوړ شوی وو.
د سرپل د اطلاعاتو او کلتور رئيس مولوي عبدالغفار حقنما وويل: د ياد سيمينار څخه يې موخه د دولتي ادارو د مطبوعاتي مسؤولينو او وياندويانو مسلکي کول وو، نوموړي له دوی څخه غوښتنه وکړه، چې د اطلاع رسونې پر مهال د اسلامي نظام ښه تصوير تر نړيوالو ورسوي او د خبرونو او راپورونو د جوړولو پر مهال ملي ګټې په پام کې ونيسي.
د سيمينار ګډونوالو د اطلاعاتو اوکلتور رياست څخه د داسې مسلکي سيمينار د ترسره کولو له امله مننه وکړه، او ياد سيمينار يې د مسلکي کولو په برخه کې ډېر ګټور وباله.
۱۴۴۵/۶/۲۶ هـ ق
۱۴۰۲/۱۰/۱۸ هـ ش
