د کندوز عامه کتابتون سره د سلګونه ټوکو کتابونو مرسته وشوه
د اطلاعاتو او کلتور وزارت د عامه کتابتونونو رياست له لوري د کندز ولايت عامه کتابتون سره د سلګونه ټوکو کتابونو مرسته وشوه.
مرسته شويو کتابونو کې بېلابېل ديني، حقوقي، ټولنيز او معلوماتي کتابونه شامل دي، چې شمېر يې شاوخوا ۵۰۰ ټوکو ته رسيږي.
د کندوز ولايت د اطلاعاتو او کلتور رئیس مولوي ګل محمد الیاس د عامه کتابتونونو ریاست څخه د مرسته شویو کتابونو له امله د مننې ترڅنګ وویل: د اطلاعاتو او کلتور رياست د نورو فعاليتونو تر څنګ د کتاب لوستنې دود پیاوړتیا لپاره له بېلا بېلو لارو چارو کار اخلي او د لوستونکو لپاره يې د کتاب لوستلو منظم چاپېریال برابر کړی دی.
همدا راز د کندوز عامه کتابتون مدیر عبدالسلیم سروري وویل: د اسلامي امارت په راتلو سره د کتاب لوستنې مینوالو کې د پام وړ زياتوالی راغلی او هره ورځ له ۲۰ څخه تر ۳۰ تنو پورې لوستونکي کتابتون ته راځي او د خپلې خوښې کتابونه لولي.
د یادونې وړ ده، چې اوسمهال د کندوز اطلاعاتو او کلتور ریاست په چوکاټ کې درې عامه کتابتونونه شتون لري، چې له 16000 څخه ډېر کتابونه پکښې موجود دي.
۱۴۴۶/۷/۱۳ ق
۱۴۰۳/۱۰/۲۴ ل
