د کتاب پلورونکو او خپرندویانو څخه د ملاتړ او ستونزو ته يې د رسيدنې په موخه ناسته ترسره شوه
نن چهارشنبه ( ۶ د رجب المرجب ۱۴۴۵) د اطلاعاتو او کلتور وزارت په نشراتو معينيت کې د سرپرست معين مولوي ضياءالحق حقمل په مشرۍ د کتاب پلورونکو او خپرندويانو څخه د ملاتړ او ستونزو ته يې د رسيدنې په موخه ناسته ترسره شوه.
یاده ناسته کې د مولوي ضياءالحق حقمل په ګډون د کاپي رايټ آمر مولوي عبدالحق حماد، يو شمېر خپرندويانو او د کتاب پلورنځيو مسؤولينو ګډون کړی وو.
د کتاب پلورونکو او خپرندويانو په استازيتوب ښاغلي مختارزاده د دوی ستونزې، وړانديزونه او غوښتنې بيان کړې، نوموړي وويل: خپرندويان او کتاب پلورونکي د اطلاعاتو او کلتور وزارت سره هر وخت همکار دي او زياته يې کړه چې بايد د اطلاعاتو او کلتور وزارت له لوري کتاب پلورونکو او خپرندويانو سره لا ډېره همکاري وشي او ستونزو ته يې پر وخت رسيدګي وشي.
ورپسې، د نشراتو معينيت سرپرست ښاغلي حقمل وويل: اطلاعاتو او کلتور وزارت ستاسې سره په بشپړه توګه همکار دی او وخت پر وخت مو ستونزو او مشکلاتو ته رسيدګي کوي.
ورپسې ښاغلي حماد صاحب ويل: چې په دې وروستيو کې د کتاب پلورونکو، خپرندويانو او وزارت تر منځ همغږۍ زياته شوې ده او مشکلاتو ته يې پر وخت او بغير له کومه خنډه رسيدګي کېږي او لا نوره هڅه کوو چې په دې برخو کې خنډونه له مينځه يوسو.
