د کتاب دارۍ اساساتو د پیژندنې درې ورځنی پروګرام پیل شو

سه شنبه ( ۱۴۴۷ربیع الاول ۲۳مه) د اطلاعاتو او کلتور وزارت اړوند  دعامه کتابتونونو ریاست له لوري د خصوصي پوهنتونونو ریاست په همکارۍ د کتاب دارۍ اساساتو د پیژندنې په نوم د ۲۵ خصوصي پوهنتونونو د کتابتونونو د مسؤلينو ظرفیت لوړونې په موخه درې ورځنی روزنیز پروګرام د یاد ریاست په تالار کې پیل شو.
د عامه کتابتونونو ریاست مسؤلین وایي: په دې پروګرام کې د کتاب دارۍ د اساساتو، لړلیک لیکلو، درجه بندۍ، په کتابتونونو کې په کتابونو لیبل لګول، د کتاب دارۍ اخلاق او مسؤلیتونه تدرسیږي.
د عامه کتابتونونو رئیس دوکتور رفیع الله صمیم ګډونوالو ته د ښه راغلاست ترڅنګ وویل: د عامه کتابتونونو ریاست د مطالعې دود عامول، د کتابتونونو د کارکوونکو ظرفیت لوړول او د کتابتونونو د لا ښه تنظیم په پار هڅې کوي، دا مهال په ټول هېواد کې ۱۰۵ عامه دولتي کتابتونونه او لسګونه نور خصوصي کتابتونونه فعالیت کوي، نوموړي له ګډونوالو وغوښتل، چې له دغه روزنیز پروګرام څخه ښه استفاده وکړي.
د یادونې وړ ده، چې د اطلاعاتو او کلتور وزارت اړوند عامه کتابتونونو ریاست تر دې له مخه هم د کتابتونونو مسؤلينو ته شپږ ورځنی روزنیز سیمینار جوړ کړی و.