د کاپیسا ولایت اړوند د موري خمزرګر لرغونې سیمې دوو لرغونو ساحو په اساسي توګه حفاظتي چارې ترسره شوې او په دغو ساحو کې درې قلمه لرغونو اثارو وموندل شول
د اطلاعاتو او فرهنګ وزارت د لرغون پېژندنې ریاست مسلکي پلاوي کاپیسا ولایت ته د رسمي سفر په ترڅ کې د موري خمزرګر د لرغونې سیمې دوو هغو برخو، چې د ۱۳۹۸ او ۱۳۹۹ لمریز کلونو په ترڅ کې په علمي ډول پکې کیندنې شوې وې، اوس د اطلاعاتو او فرهنګ وزارت په مالي ملاتړ د یادو ساحو حفاظتي چارې ترسره شوې، په دغو ساحو کې د عاليقدر امیرالمؤمنین (حفظهالله) د (د لرغونو سیمو ساتنه او مدیریت) فرمان پراساس لازم اقدامات ترسره شول، چې د پاککارۍ فعالیتونو پر مهال درې ډوله ډبرین او سفالي لرغوني اثار هم پکې وموندل شول او له ثبت او مستندسازۍ وروسته، یو اثر یې په کابل کې د افغانستان ملي موزیم او دوه نور یې د کاپیسا ولایت سیمهییز موزیم ته انتقال او وسپارل شول.
د ترسره شویو کیندنو او د لرغونپوهنې څېړنو د پایلو پر اساس، موري خمزرګر د افغانستان له مهمو تاریخي سیمو څخه ګڼل کېږي، چې له دې سیمې څخه ګڼ شمېر نور ارزښتمن منقول او غیرمنقول اثار هم موندل شوي دي.
د لرغون پېژندې رئیس سید ذبیحالله سادات د دغه پروګرام له پلي کېدو څخه د خوښی څرګندولو ترڅنګ د مسلکي پلاوي له هڅو او د سیمې د اوسېدونکو له همکارۍ څخه مننه وکړه او په ټول هېواد کې یې له ګواښ سره مخ لرغونو سیمو د ساتنې او بیارغونې د پروګرامونو پر دوام ټینګار وکړ.
نوموړي زیاته کړه، چې د هېواد د فرهنګي میراثونو ساتنه او پالنه، سربېره پر دې چې د افغانستان د تاریخي او تمدني هویت د خوندي کولو لامل کېږي، کولای شي د سیمې د یو شمېر اړمنو کورنیو لپاره د کاري زمینې او اقتصادي وضعیت د ښه کېدو زمینه هم برابره کړي.
۱۴۴۸/۲/۲۶ هـ ق
