د څرخي پله بند خونې له بندیانو څخه د سيرت نبي او اسلامي تاريخ سيالۍ د اخیستل شوې آزموینې پایلې اعلان شوې
د اطلاعاتو او کلتور وزارت اړوند د بیهقي کتاب خپرولو رياست او زندانونو چارو د سمون ادارې په همکارۍ د څرخي پله بند خونې له ۴۵۰ تنه بندیانو څخه د سيرت نبي او اسلامي تاريخ سيالۍ د اخیستل شوې آزموینې پایلې اعلان او ۱۵ تنه مخکښ ګډونوال یې وستایل شول.
په پیل کې د اطلاعاتو او کلتور وزارت د خپرونو چارو معین مهاجر فراهي وويل: بندخونې په اوس وخت کې د بنديانو لپاره د زده کړو په مرکزونو بدل شوي دي چې دوی ته پکې ديني، عصري او حرفوي زده کړې ورکول کېږي، زندانیان باید له خپل وخت څخه د علم، حرفوي او ديني زده کړو په برخه کې ګټه واخلي؛ همدارنګه ښاغلي مهاجر فراهي وویل چې اوس د پخوا په څېر بنديان د ستونزو سره مخامخ نه دي او هغوی ته خپل حقوق ورکول کېږي.
ورپسې د بند خونو چارو د سمون ادارې د تعليم، تجديد او تربیې رئيس مولوي نظر محمد ناصري وويل: بندیانو ته د اسلامي نظام غوښتنو سره سم په بندخونو کې دننه عقيدتي خدمتونه، عصري او حرفوي زده کړې او ورزشي خدمتونه وړاندې کېږي، تر څو بندیان ور څخه برخمن شي؛ همدا راز بندیانو ته د اطلاعاتو او کلتور وزارت د بیهقي کتاب خپرولو رياست له لوري تاسې ته د مطالعې زمينه برابره شوې ده، چې راتلونکي کې د ټولو بندیانو لپاره د تفسير، ديني او عقيدتي زده کړو زمینه د روژې په مبارکه میاشت کې هم پیل کېږي.
د بیهقي کتاب خپرولو رياست د قرآن کريم د ليکلو آمر مولوي عزت الله عابد وويل: د نبوي سيرت مطالعه د انسان فکري، عقيدتي او د ژوند د بېلابېلو برخو په رغولو کې حياتي رول لري، باید هر انسان یې په اړه معلومات ترلاسه کړي او په ژوند کې یې عملي کړي.
د یادونې وړ ده چې پر افغانستان د اسلامي امارت د بیا ځلې واکمنۍ را پدیخوا د هېواد ټولې بند خونې په ښوونیزو مرکزونو بدله شوې دي، چې بنديان به ور څخه خپلو کورونو ته په ديني، عقيدتي، حرفوي او عصري زده کړو سمبال ستانه کېږي.
۱۴۴۶/۸/۲۷ هـ .س
۱۴۰۳/۱۲/۸ هـ . ل
