د ځوانانو چارو معینیت سرپرست د سرپل د اطلاعاتو او کلتور ریاست، عامه کتابتون او د ځوانانو د استعدادونو او سوداګریزو مهارتونو د ودې له مرکز څخه لیدنه وکړه
د اطلاعاتو او کلتور وزارت د ځوانانو چارو د معینیت سرپرست مولوي سید محمد سعید د یوه پلاوي په ملتیا د سرپل اطلاعاتو او کلتور ریاست، عامه کتابتون او د ځوانانو د استعدادونو او سوداګریزو مهارتونو د ودې له مرکز څخه لیدنه وکړه.
د لیدنې په پیل کې د سرپل د اطلاعاتو او کلتور رییس د ځوانانو چارو د معینیت سرپرست او ورسره مل پلاوي د ورتګ څخه د مننې کولو ترڅنګ د دې ریاست د ترسره شویو فعالیتونو او راتلونکو پلانونو په اړه معلومات وړاندې کړل، د فرهنګي او ځوانانو په برخو کې د اړوندو موخو د تحقق لپاره یې پر دوامدارې همکارۍ ټینګار وکړ.
د ځوانانو چارو د معینیت سرپرست مولوي سید محمد سعید د عامه کتابتون د لیدنې پر مهال، دغه فرهنګي بنسټ د ځوانانو د استعدادونو د ودې او فکري روزنې کور وباله او په ټولنه کې د پوهاوي د کچې لوړېدو، علمي ودې او د مطالعې د فرهنګ په پراختیا کې یې د کتابتونونو پر مهم رول ټینګار وکړ. ښاغلي سعید ډاډ څرګند کړ، چې د اطلاعاتو او کلتور وزارت به د عامه کتابتون د وضعیت د ښه والي او لا بډاینې لپاره اړینې همکارۍ ترسره کړي.
ښاغلي سعید د اطلاعاتو او کلتور ریاست اړوند د ځوانانو د استعدادونو او سوداګریزو مهارتونو د ودې مرکز له درسي ټولګیو څخه هم لیدنه وکړه او د استادانو، مسوولینو او کارکوونکو د ترسره کړیو هڅو د ستاینې تر څنګ یې د ښوونیز کیفیت د لوړولو، د ځوانانو د مسلکي مهارتونو د پیاوړتیا او د فرهنګ، اطلاعاتو او ځوانانو چارو په برخو کې د اغېزمنو خدمتونو د پراختیا په موخه لازمې لارښوونې وکړې.
د یادونې وړ ده، چې په دې ولایت کې د ځوانانو چارو آمریت د ځوانانو د استعدادونو او سوداګریزو مهارتونو د پراختیا له مرکز څخه د اکتید موسسې په همکارۍ ۹۲ تنه ځوانان د فریلانسینګ (ازاد او انلاین سوداګرۍ)، ګرافیک ډیزاین، انګلیسي ژبې او کمپیوټر په برخو کې له دریو میاشتنیو ښوونیزو ټولګیو څخه د يو لړ مراسمو په ترڅ کې فارغ شول.
۱۴۴۷/۸/۱۲ هـ ق
