د پنجشېر د اطلاعاتو او کلتور رياست روان کال له لاسته راوړنو ډک بللی دی

د پنجشېر ولايت د اطلاعاتو او کلتور رياست مسؤلين وايي: روان کال کې دې ادارې ته په مختلفو برخو لکه کلتوري، رسنيزې، د ځوانانو د ودې او د ګرځندوی د ودې برخه کې له لاسته راوړنو ډک کال و.

د اطلاعاتو او کلتور رئيس مولانا نصرالله ملکزاده د ياد رياست د يو کلن ګزارش ورکولو پرمهال وويل: ځوانانو ته د تحصيلي او ښوونيزو پروګرامونو د برابرولو، اطلاع رسونې، خصوصي او امارتي راډيوګانو د فعالولو او له خبريالانو او رسنيو څخه د عام و تام ملاتړ په برخه کې سږکال ډېرې لاسته راوړنې لري، د ځوانانو لپاره په مرکز بازارک او درې ولسوالۍ کې د ژمنيو ښوونيزو کورسونو په جوړولو سره دا مهال ۱۵۰ تنه ځوانان په زده کړو بوخت دي، د ولسواليو په کچه کلتوري پروګرامونه ترسره شوي، په محلي او ملي سطحه د اسلامي امارت لاسته راوړنو ته انعکاس ورکړل شوی، د توت فسټيوال جوړ شو او د سيرت النبي (ص) سيالي ترسره شوه، د مسؤل نظام او هوسا ملت پروګرام په ترسره کولو کې د اطلاعاتو او کلتور رياست مستقيمه همکاري وکړه، د خبريالانو د خونديتوب کميټه جوړه شوه، د لوحو او تابلوګانو د اصلاح کميټه جوړه شوه او د ولايت په سطحه يې فعاليت شروع کړ او له تاريخي آبداتو څخه ليدنه او څارنه ترسره شوې ده.

نوموړي زياته کړه؛ د روان کال په ترڅ کې د پنجشېر ولايت د اطلاعاتو او کلتور رياست په هڅو د (۲۴ د اسد) د امريکايي اشغالګرانو د وتلو ورځ په شاندارو مراسمو سره ولمانځل شوه، سلګونه سيلانيانو ته پنجشېر کې د سياحت زمينه برابره شوه او هر ډول اړينه مرسته ورسره وشوه، د مثنوي لوستنې مراسم ترسره شول او د کتابونو نندارتونه جوړ کړل شول.

د ښاغلي ملکزاده په وينا؛ دا مهال د اطلاعاتو او کلتور رياست له لوري هڅې روانې دي چې د ازادۍ مطبعې امارتي شرکت په واسطه د پنجشېر ولايت مطبعه بيا ځل فعاله شي.

نوموړي وویل: راراوان کال ته به کلتوري پروګرامونه ډير شي، همداراز يې د ځوانانو لپاره د کمپيوټر زده کړو کورسونو  د پراختيا، د بیهقي کتاب پلورولو د مرکز د جوړونې او پنجشېر ولايت کې په مناسبو ځایونو کې پر ديوالونو د اسلامي او ملي متنونو د ليکلو په اړه خبرتيا ورکړه.

۱۴۴۵/۸/۲۲ هـ ق
۱۴۰۲/۱۲/۱۳ هـ ل