د هنر او کلتور معین مولوي عتیق الله عزیزي د يونسکو سازمان له رئيسې سره وکتل
پنجشبنه ( ۱۴ د رجب المرجب ۱۴۴۵) د اطلاعاتو کلتور وزارت د هنر او کلتور معین مولوي عتیق الله عزیزي په خپل کاري دفتر کې، افغانستان لپاره د یونسکو سازمان له رئیسې پتریشا مک فلیپس او مل پلاوي سره ناسته وکړه.
د هنر او کلتور معین مولوي عتیق الله عزیزي د هېواد د تاریخي آبدو او کلتوري سیمو وضعیت په اړه معلومات شريک کړل او زیاته یې کړه؛ د اسلامي امارت په راتګ سره د هېواد زیات شمېر تاریخي ابدو ته رسیدګي شوې، دهغو له حالت او وضعیت پوښتنه شوې او لسګونه داسې ابدې چې له خطر سره مخ وې ترمیم شوي دي، همدا ډول د قاچاق او غصب مخه نيول شوېده.
ښاغلي عزيزي وويل: اسلامي امارت د هېواد د تاریخي او کلتوري هویت د ساتنې لپاره ژمن دی او له نړیوالو کلتوري ټولنو څخه مو غوښتنه ده چې کلتوري ساحه په سياست پورې ونه تړي او دې برخه کې افغانستان سره مرسته وکړي.
د یونسکو سازمان مشرې پتریشا مک فلیپس وویل: د اطلاعاتو او کلتور وزارت د کلتوري میراثونو د ساتنې برخه کې هڅاند دی اوغواړو په ګډه دغو هڅو ته پراختیا ورکړو، یونسکو په روان ميلادي کال کې د افغانسان د کلتوري او تاریخي هویت د ساتنې لپاره خپل فعالیتونو ته انکشاف ورکوي.
آغلې فليپس زياته کړه؛ یونسکو د غور ولایت منار جام د استحکام لپاره، د بامیانو او نورو سيمو د ساتنې او مرستو لپاره د یو نوي پلان له مخې کار پیل کوي او همدارنګه په افغانستان کې به د هنرمندانو (خطاطانو، ميناتورانو، نقاشانو..) د ظرفیت لوړونې لپاره هم له اطلاعاتو او کلتور وزارت سره منسجمې برنامې پلي کړي.
