د نېکمرغه لوی اختر په مناسبت د اطلاعاتو او فرهنګ وزارت د مشرتابه پیغام!
د اطلاعاتو او فرهنګ وزارت مشرتابه د نیکمرغه لوی اختر د رارسېدو په مناسبت د افغانستان اسلامي جمهوریت جمهور رییس، د دولت مشرتابه غړیو او همدارنګه د افغانستان مسلمان ملت او د نړۍ نورو مسلمانانو ته د زړه له تله مبارکي وایي.
سږکال افغانان لوی اختر په داسې وخت کې نمانځي چې له یوې خوا د هېواد د خپلواکۍ د سلمې کالیزې نمانځلو ته پراخ تیاری نیول شوی دی او له بلې خوا په افغانستان کې اوږدې جګړې ته د پای ورکولو لپاره په ملي او نړیواله کچه غوره فرصت برابر شوی دی چې باید ښه ګټه ترې واخیستل شي.
له بده مرغه د سولې او امنیت دښمنانو د لوی اختر په درشل کې په کابل او د هېواد په یو شمېر نورو سیموکې خونړي ترهګریز بریدونه تر سره کړل او زموږ ګڼې کورنۍ یې د ویر پر ټغر کېنولې او د دوی د اختر خوشالي یې پر غم او ماتم بدله کړه.
دغو بریدتونو یو ځل بیا په ډاګه کړه چې ترهګر د هېڅ ډول ملي او دیني ارزښتونو پروا نه ساتي او خپلو کرغېړنو موخو ته د رسېدو لپاره په هر ډول جنایت لاس پورې کوي.
د اطلاعاتو او فرهنګ وزارت د ټولو شهیدانو له کورنیو سره خپله خواخوږي څرګندوي او د لوی خدای (ج) له درباره څخه شهیدانو ته جنت او ټپیانو ته د بشپړې روغتیا هیله کوي.
د اطلاعاتو او فرهنګ وزارت هیله لري چې پر دین میېن افغان ولس لوی اختر د خوښۍ او خوشالۍ په شېبو کې تېر کړي اوهغه هیلې یې رښتیا شي چې له لسیزو راهیسې یې تلپاتې سولې او امنیت، سوکالۍ او پرمختګ ته د رسېدو لپاره په زړونو کې پاللې دي.
