د نبي اکرم ﷺ د سيرت سيالۍ غوره کسانو ته جايزې ورکړل شوې
د نيمروز ولايت د اطلاعاتو او کلتور رياست لخوا د نبي اکرم ﷺ د سیرت سیالۍ ۲۰ تنو غوره کسانو ته د جایزو ورکولو مراسم په داسې حال کې چې د نیمروز ولایت د اطلاعاتو او کلتور رئیس الحاج مفتي حبیبالله الهام، د ولایت مقام استازی مولوي مطيعالله قیام، د علماوو شورا استازی مولوي ذکریا عظیمي، د لوړو زده کړو مؤسسې رئیس مولوي محمد صدیق بنيکمال، د مخابراتو او ټکنالوژۍ رئیس مولوي عبدالرحیم فیاض، د ملي راډیو ټلویزیون آمر ملا عبدالستار ندیم او نورو ځوانانو هم برخه اخيستې وه ترسره شوه.
ياده غونډه د قرآن عظيم الشان په تلاوت سره پيل شوه، ورپسې د نيمروز د اطلاعاتو او کلتور رئيس الحاج مفتي حبيبالله الهام د سيرت النبي ﷺ سيالۍ د ترسره کېدو په اړه خبرې وکړې او ويې ويل: ياده سيالي د ځوانانو د تشويق، ترغیب او هڅونې په موخه ترسره شوه، ترڅو ځوانان د رسولالله ﷺ د سیرت او اخلاقو په اړه معلومات لاسته راوړي او د ژوند په چارو کې د رسولالله ﷺ افعال او کړنې عملي کړي.
په یاده غونډه کې د نیمروز د لوړو زده کړو مؤسسې رئیس مولوي محمدصدیق "بنيکمال" د پیغمبر ﷺ د سیرت د لوستلو په اړه خبرې وکړې او د سیرت له لوستلو څخه يې موخه د رسولالله ﷺ د ژوند په اړه معلومات، ترې پيروي کول او خپل ژوند د رسولالله ﷺ په لاره برابرول، یاده کړل.
په یاده سیالۍ کې چې ټولټال ۳۸۰ تنو ځوانانو ګډون کړی و، ۲۰ تنو غوره ګډونوالو ته جايزې ورکړل شوې.
۱۴۴۵/۳/۱۸ هـ ق
۱۴۰۲/۷/۱۱ هـ ش
