د فکري جګړې په اړه علمي سیمینار وړاندې شو

د غزني ولایت د اطلاعاتو او فرهنګ ریاست له لوري د دغه ولایت د مبلغینو په مرکز کې د فکري جګړې په اړه علمي سیمینار ترسره شو.
د سیمینار په پیل کې د غزني د اطلاعاتو او فرهنګ رئیس ملا حمیدالله نثار د فکري جګړې پر اغېزو، د ټولنې د ټولو قشرونو د سالمې روزنې او د اسلامي او ملي ارزښتونو د ساتنې پر اهمیت خبرې وکړې. نوموړي وویل: د ټولنې د فکري ثبات او د خلکو پوهاوی د اطلاعاتو او فرهنګ ریاست له لومړیتوبونو څخه دي او په دې برخه کې به ورته علمي او روزنیز پروګرامونه دوام ولري.
ښاغلي نثار له مبلغینو څخه وغوښتل چې د فکري جکړې په اړه په عامه پوهاوي کې له یاد ریاست سره پوره همکاري وکړي.
دغه راز د اطلاعاتو او فرهنګ ریاست د ښوونیز مرکز استاد د فکري جګړې د مفهوم، لاملونو، اغېزو او د مخنیوي د لارو چارو په اړه هر اړخیز سیمینار وړاندې کړ او د ګډونوالو پوښتنو ته یې مناسب ځوابونه وویل.
د مبلغینو د مرکز مسؤلینو او د سیمینار ګډونوالو د دغه علمي پروګرام له جوړېدو څخه هرکلی وکړ او ویې ویل: دا ډول سیمینارونه د دیني مبلغینو د فکري وړتیاوو په پیاوړتیا او د ټولنې د سالمې لارښوونې په برخه کې مهم رول لري.

۱۴۴۸/۲/۱۸ هـ ق